لقاء مع هادي بإزاعة صوت الموسيقى

مرحبا
هي مقابلة قديمة مع هادي
ليلي ما بيعرفو هادي يتعرفو عليه
تفضلوا:
يوم 3-11-2005
بدأ اللقاء الساعة 1.23 ليلا بس أتخلل اللقاء كثيرمن الفقرات.......
بدأ اللقاء بأغنية بيستاهل قلبك بعدين رحب المذيع نيكولا داغر بهادي كثير مع إنه هادي مثل العادة ما خلاه يقدمه و هو قدم حاله لحاله بس
نيكولا رجع و قدمه و قال :ضيفنا اليوم نجم من نجوم سوبر ستار 2 من الأشخاص يلي تميزوا بطلتن و بصوتن الرائع ، بدي رحب فيك و أنا الي الشرف انو أول مرة بكون معك بلقاء مباشر .

هادي: أنا الي الشرف إني كون معكن اليوم و الي الشرف اطلع على إذاعتكن يلي أنا كثير بحبا شخصيا.

نيكولا : تسلم ،كثير بتحبا ؟؟؟؟؟؟

هادي : أي أكيد و هي يللي أول من حطتلي غنيتي / يضحك /

نيكولا : اليوم أكيد رح نتلقى اتصالات من المعجبين و يسألوك ، عندك مشكلة مع أي سؤال بينطرح عليك ؟؟؟

هادي : لأ أبدا أبدا شو ما بدك أسألني ..

نيكولا : لكن خلينا نتلقى أول اتصال معنا من باتريسيا

/ حيت هادي و سلمت عليه و سألته عن جديدة /

هادي : هلأ أنا من شي 4 أيام صورت الكليب مع المخرج هادي أبي وردة و كثير كان حلو و فريق العمل كان كثير قوي بدي أشكرن كلن
و كمان بدي أشكر الحلاق وفيق صعب و كل حدا ساعدني ...

باتريسيا : طيب و إيمتى رح نشوف الكليب ؟؟؟

هادي : ليكي أنا بخاف نزله على العيد، أول الشي ما بلحق و تاني الشي انو نازل للفنانين الكبار أعمال ع العيد فما رح نزل بالعيد بين
الفنانين لأنو بركي بضيع بالعجقة / يضحك / فبعد العيد إن شاء الله

باتريسيا : طيب و على أي محطة رح ينزل ؟؟؟

هادي : على ميلودي أول الشي فضائيا و على المستقبل أرضيا..

نيكولا : شكرا باتريسيا ،

هادي خلينا نبلش معك بسؤال بيقول :بعد سوبر ستار لوين توجهت و مين بلش يساعدك و مين وقف حدك و مين بعد عنك ..

هادي مقاطعا: ما حدا بعد عني..

نيكولا : طيب حدا كان واعدك بشي و ما نفذلك من الناحية الفنية طبعا؟؟؟

هادي : في كثير أكيد و كل العالم بتعرف انو الدني فيا كذابين و فيا عالم صادقة بس أنا بالنهاية بعتمد على حالي يعني الكليب هلأ صورته
من إنتاجي الخاص و كل شي على حسابي و بدي أشكر هون المخرج هادي أبي وردة عنجد يلي ساعدني شوي بتكاليف الكليب..

نيكولا : طيب برأيك قديش الفنان بيقدر يحمل التكاليف؟؟

هادي : ما بيقدر يحمل كثير بس إذا بيحب فنه بيقدر يحمل بس أكيد بدو حدا يساعدو

نيكولا : يعني أنت مستعد تراكم يمكن بالبداية أول الشي عليك مبلغ معين من المال مثل دين بس لمجرد إنك تنطلق؟؟

هادي : و هيدا يلي عم بيصير / يضحك/ بالنهاية أنا بحب الفن ..

نيكولا مقاطعا : هون أكيد عندك عتب على حدا؟

هادي : ما بعتب على حدا يعني خلاص شو بدي أعتب هلأ وقت العتب بدي فكر بشغلي المهم شغلي ماشي و الحمد لله و إن شاء الله يا رب
الله يكون معي و التوفيق من الله

نيكولا : طيب رح نقرأ مسج من سعدية بتقلك هاي هادي كيفك يا حبيب الكل آنت أهضم شكل و أحلى صوت بسوبر ستارو حابة أسمع
أغنية تبكي الطيور بصوتك و سلامي لشادي

هادي : بدي أشكرا كلا ذوق و خلص رح غني تبكي الطيور من عيوني

نيكولا : كمان مسج من نزيهة أطيب تحية مني لهادي بدي قله أنا بحب صوتك و شخصيتك و أكثر شي ابتسامتك ....
يا عمي بلش الغزل

هادي :شو بدي قلن أنا ما بعرف عبر بتلبك / يضحك / بس بقلن أنا بحبن كثير كمان

نيكولا : لمياء بتقول هاي لهادي ،، و تفضل هادي الميكروفون الك سمعنا تبكي الطيور

/ غنى تبكي الطيور و بعدا حطوا مقطع من تبكي الطيور بصوت وائل كفوري /

نيكولا : حرام هادي تركناه لحاله بالأستوديو سوري

هادي : زعلان منك ما تحكي معي زعلان منك / يضحك / ،

نيكولا : طيب شو بدك لترضى ،

هادي : ما تحكي معي خلاص ،

نيكولا : يا لطيف طيب بتحب تكمل المقابلة لحالك ،

هادي : جيبوا لي حدا غيره / يضحك / عم أمزح

نيكولا : جيبوا له كاسة مي ،

هادي : أيوا كاسة المي هي الأساس بس ما تكون مسقعة

نيكولا : هادي أول الشي بدي قلك صوتك رائع كتير كتير

هادي : شكرا،مقدم

نيكولا : ميرسي الله يخليلك ياه / يضحكان /

نيكولا:هادي عندك معجبات و معجبين الله يخليلك ياهن بدي قول هاي لسومي عمرا 13 سنة بتقول أنا بحب هادي كثير و كثير بوجه له
تحية كبيرة و بتقول بدا تسمع أي شي بصوتك و كمان معتز من سوريا بيقول بوجه تحية عطرة لسوبر ستار 2 النجم هادي أسود و بيقلك
ناطر أعمالك

هادي : شكرا كله ذوق

نيكولا : هادي خبرني شوي بعد مرورك ببرنامج سوبر ستار 2 قديش هالبرنامج عطاك ثقة بحالك قديش حسيت حالك ممكن تتواصل
مع الناس لو وقفت على خشبة المسرح و قدمت بعض الأغنيات أو قدمت الفن يلي آنت بتملكه؟؟

هادي : عطاني ثقة بحالي ؟؟؟ ليك الثقة اكتسبتا بعد البرنامج بس شفت حب العالم بس عطاني قوة أكثر لحتى حافظ على حب الناس يلي
أنا بحبن كثير و صدقني قلتلك أنا ما بعرف جامل فلما بشوف الناس بتسلم عليي بالطريق أنا بتلبك و ما بعرف شو بدي أعمل يعني بخاف
يفكروني شايف حالي أو شي بس الناس الحمد لله بيحبوني و بيعرفوا و بيفهموني ، حب الناس الي هو كل شي عندي

نيكولا : حب الناس الك دفعك شي مرة .. لأنو بالعادة حب الناس الكثير زايد عن حده يمكن بيساعد الطرف الآخر يشوف حاله أو بيساعده
لحتى يتملك فيه الغرور أكثر

هادي : لا لا صرت أحمل هم أكثر و أتواضع أكثر لأنه يعني هدول العالم هنن يلي آنا من أيدين صرت يعني انا لولاهن ما بسوى شي يعني
هنن فين ينزلوني ويطلعوني فإذا كنت أنا متواضع معن و أنا مثل ما أنا معن حيحبوني و حيزيدوا أكثر و أنا هيك الحمد لله طبعي أنا متواضع
و عشري و بحب العالم

نيكولا : هادي بعد الأغنية يلي عملتا لوين رحت؟؟

هادي: الأغنية عملتا من شي سنة أتخيل نزلت من شي 4 أشهر

نيكولا مقاطعا : طيب ليش التأخير؟؟

هادي : الأوضاع يلي صارت بلبنان كثير ضرتنا

نيكولا : طيب هادي في حدا شي مرة عرقلك طريقك ؟؟

هادي: ما بعرف !!!

نيكولا : عندك أعداء هادي ؟؟؟

هادي : إن شاء الله لأ .. ما بعرف

نيكولا : عندك حدا كان بيغار منك بالبرنامج أنت كنت تحس إنه بيغار منك بينك و بين حالك حسيت انو حدا بيغار منك؟؟؟

هادي : أكيد ..عادي و أنا بغار كمان

نيكولا : أنت بتغار !!؟؟

هادي : طبعا بغار الإنسان يلي ما بيغار ما بينجح / يضحك /

نيكولا : أكيد هلأ يلي بيغار شغلة كثير حلوة خاصة إذا كان بيغار و ما بيأذي حدا هيدا شي كثير منيح يعني المنافسة الشريفة لأنه يلي بيغار
بيساعد حاله ليتقدم أكثر

هادي : أكيد و أنا هيدا الشي يلي خلاني ضل أتقدم و ضل هيك مش غيرتي يلي ساعدتني بس حتى طلع فني بالنهاية أنا حسيت حالي انو لازم
يكون الشي يلي عند غيري يكون عندي كمان فأنا بسعى بالنهاية للصوت و العلم و اللوك و كذا و كل شي

نيكولا : أهاا طيب باتريسيا بتبعت مسج و بتقول هاي هادي أنا كثير بحبك و أنا باقية معكم للساعة 3

هادي : و أنا باقي معك مع إني عم أتاوب / يضحك /

نيكولا : يعني مش كثير باقي وقت لسه في ساعة

هادي : لا أنت تأخرت و أنا بنام بكير يعني أقل الشي بنام الساعة 7 الصبح العالم بتفيق بكير و أنا بنام بكير / يضحك /

نيكولا : أنا هون بدي أشكر محلات موستاش لأنو لبسوني ،

هادي مقاطعا : و أنا كمان بدي أشكرن لأنو لابس من عندن الليلة و كمان بالكليب هنن لبسوني فبدي أشكرن و كمان بدي أشكر الحلاق
وفيق صعب يلي وقف وقفة قوية معي و بدي وجه تحية للمخرج هادي أبي وردة كمان و لكريستين جمال و لكل فريق العمل كاملا / يضحك /

نيكولا : بدنا نأخد اتصال من مها من فلسطين ، حكت مع هادي و قالتله بدنا نشوفك عنا بفلسطين

هادي : يا حبيبة قلبي فلسطين البلد يلي منحبا كثير و هي أمنية حياتي يلي عم حاول حققها لأنه عنجد انو زور أرض طاهرة هاد شرف الي
طلبت منه أغنية / لا عيوني غريبة لوديع الصافي / وقالت: على فكرة أنا هي أول مرة بسمع البرنامج على شان خاطر هادي

هادي : بدي أشكرك مها و وجه تحية لكل أهالي فلسطين يلي عم يسمعونا

/ غنى أغنية لا عيوني غربية لوديع الصافي /
نيكولا : شكرا هادي صوتك كثير حلو رح نقرأ مسج من نسمة من السعودية بتحييك و بدا تسألك شو رأيك بستار أكاديمي 1 و 2 ومين
كنت تشجع منهن ؟؟

هادي : من ستار أكاديمي 1 ؟؟؟ ليك أنا تابعتن بس ما كثير كنت مركز بس منن بحب و بنبسط ببشار الشطي لأنو دارس موسيقى
و أحمد الشريف و من البنات بحب ليلى اسكندر أما ستار أكاديمي 2 ؟؟؟ بحبن كلن و كلن مهضومين و طيوبين بس بصراحة ما ركزت
بالأصوات و ما حفظت أسماؤن لأنو كنا بسوبر ستار 2 بس أنا بسمع من أصحابي و أكيد ما غلط إني ما بعرفن أو هيك بس الغلط إذا بدي
أحكي علين عيب لأنو هنن شخصيا كثير طيبين و طبيعيين

نيكولا : خلينا نأخذ اتصال من الإمارات من حنين ، حنين رحبت بهادي و قالتله نحن عم نستنى الكليب على أحر من الجمر و إن شاء الله
الله يوفقه يا رب و قالتله : هادي بدي أطلب منك تغنيلنا أغنية رح حلفك بالغصن أنا بعرف انو أنت بتحب هالأغنية و نحنا منحبا كثير منك
و بدي قلك كمان كل البنات بالجروب بيسلموا عليك و بدنا نعايدك بالعيد و نقلك كل عام و أنت بخير و كلن بيحبوك و كلن عم يستنوك و كلن
بدن يدعموك و يشجعوك إن شاء الله بمجرد ما ينزل الكليب تأكد إنه كلنا حدك و دايما وراك و شكرا

هادي : و أنا بحبك و بحبن كثير و بحب كل يلي عم يسمعنا و بدي عايدك و عايد الكل و عيد سعيد على الكل

نيكولا : شكرا حنين ، و بدي قول للناس هلأ أكيد يلي بلشوا يتسحروا صحة و هنا و تحياتنا الن ، هادي بهالأثناء عم يأكل فطاير جبنة صحتين
هادي ، هلأ رح نأخذ اتصال من منال سلمت على هادي و رحبت فيه

نيكولا : في تحية من الفنان ..

هادي مقاطعا : الفنان فادي عبد الخالق حبيب قلبي و أنا بدي قلك شغلة فادي عبد الخالق من العالم يلي بتعقد أن حكيت معه مرة ع التلفون
من قبل سوبر ستار كان يتصل يتطمن علينا و هو كثير بيحب خيي شادي و أنا كثير بحبه شخصيا و صوته بيعقد بس ما أخذ حقه أبدا

نيكولا : و أنت بتحب خييك فنيا؟؟

هادي : أنا بكل شي بحب خيي مش بس لأنه خيي لأنو فنيا هو نجم و الو مستقبل كبير

نيكولا : رح نحكي عن الكليب يلي أتصور مؤخرا ايمتى رح نشوفه قريبا ؟؟

هادي : انا حكيت صورته من 3 أيام و قريبا إن شاء الله رح ينزل بعد العيد ع الميلودي فضائيا و المستقبل أرضيا

نيكولا : طيب خبرني كيف كان كان في صعوبات كأول كليب صورته و مين يلي ساعدك و شارك بالكليب؟؟؟

هادي : خليني قلك ما بدي أقعد إنسى حدا أول الشي الكليب كان كثير حلو و الحمد لله و أنا بالنسبة الي كثير الفكرة جديدة و كثير عانيت
لأنو 6 ساعات كنت بقلب المي و المي كثير سقعة و عملنا غرفة ....خلص ما رح أحكي عنه خلص مش رح أحكي عن الفكرة تتضل
تحضرها العالم ، أتعاملت فيه مع المخرج هادي أبي وردة و الإنتاج كان أنا و هو ع حسابنا و شو بدي قلك هو كثير مخرج شاطر و جديد بعده
أول كليب بس مش بس لأنو أول كليب أنا اتعاملت معه هو شخص ذكي كتير هو لبناني كندي و بحب أفكاره أفكاره جديدة فبلش فينا و إن شاء
الله الناس بتحبه

نيكولا مقاطعا :حبيت الكليب معه و التعامل معه كيف؟؟؟

هادي : كثير حبيت التعامل معه كثير هو مهضوم و طيب و طريقة تعامله يعني بيريحك شو ما بدك اعمل و كيف ما بدك اتصرف لانو هو
بدو يطلع الشخص ع طبيعته ، أنت حبوك الناس ع طبيعتك لازم تطلع ع طبيعتك و إذا في شي مش زابط بيصلحه و فريق العمل بدي أشكرن
صدقني في عالم كثير ما بعرف أسماؤن و اشتغلوا معي كثير يعني 36 ساعة ما نمنا أنا ما نمت ، بدي اشكر المنتج المنفذ كريستين جمال
بالفيديو كليب و بدي اشكر الحلاق وفيق صعب يلي طلعني بلوك كثير حلو و بدي كمان اشكر المصور ميكي يلي إجا و أيمن الأعتر كمان
إجا ع تصوير الكليب و أصحابي وسيم صالح و أحمد خضر و علاء شلق و الملحن فادي مارديني و كل شي اشتغل بالكليب بتمنى يكونوا
إذا عم يسمعوني ما يزعلوا إذا ما بعرف أسماؤن لأنو فعلا هي مش حجة حطيتا بس صدقوني بدي قللن لكل يلي عم يسمعنا ميرسي الن
و يعطين العافية و كمان فادي البني و عم حاول أتذكر بس ما بعرف أنا بنسى و أنا نسيت حدا أكيد أنا نسيت هي عادتي بس خلص بدي قللن
ميرسي الن كلن

نيكولا : هادي عندك من لميا من المغرب مسج بتسألك فيه شو رأيك بالأغنية المغربية و هل ممكن تعمل أغنية جديدة بألبومك الجديد
للمغرب أو أغنية مغربية؟؟؟

هادي : بتمنى أكيد، يعني أنا ما بعرف ملحنين أو شعراء من المغرب بس أنا بحب كثير هاللون يعني كثير حلو و بيعمل شي جديد مغربي
و تونسي إجمالا المغرب العربي كله و أنا إجمالا عاشق صابر الرباعي الأستاذ الكبير طبعا بحب هالألوان و إن شاء الله يا رب بتمنى
انو قدم هالشي

نيكولا : عنا مسج من نزيهة بتقول كيفو شادي يا هادي

هادي : بيسلم عليكي كثير منيح

نيكولا : و بدا تسألك هادي هل فكرت بيوم إنك تعمل ديو و مع مين بتعمله؟؟

هادي : ياي إذا قلتلك شو رح تقولي عني تافه / يضحك / لا أكيد بس بتمنى كأمنية كبيرة كبيرة كثير و هي بحياتي ما رح تحقق بقلك
فيروز مثلا / يضحك / فيروز وين و هادي وين هادي بالأرض و فيروز بالسما طبعا بقلك هلأ من الفنانات يلي بحبن كثير و بتمنى
غني معن شيرين عبد الوهاب و يارا لأنو بحبن كثير و فضل شاكر كثير بحبه و وائل كفوري و معين شريف وائل جسار كلن بحبن

نيكولا : طيب شو رأيك بشيرين وجدي؟؟؟؟؟

هادي : شيرين بتعقد بحبها كثير بالتمثيل أكثر من الأغاني و طبعا هي مغنية ناجحة و أغانيا كثير حلوة بس أنا هيك كنت لاقيها بالتمثيل قوية
أكثر بشوف شخصيتها أكثر مع إنه أنا ما بيحق لي أعطي رأيي فيها

نيكولا : هادي طيب مين برأيك هو نجم العام 2005 و مين النجم يلي بيعتبر كسر الأرض بدي رأيك بصراحة؟

هادي : 3 في 3 يلي كسروا الأرض عندك فضل شاكر لأنو بيعقد أنا بموت فيه و أنا بحكيه ع التلفون و وائل كفوري و وائل جسار بيعقدوا
بالإضافة لمعين شريف هنن أحلى مين بيغني بلبنان

نيكولا : طيب و من الفنانات مين برأيك نجمة العام 2005

هادي : شيرين و يارا و عبير نعمة بالإضافة لرويدة عطية

نيكولا : طيب في اتصال من راما رحبت بهادي و خبرته قديش بتحبه

\ حطو مقطع من أغنية شيرين لازم أعيش\
نيكولا : عنا مسج من إيليا من أمريكا بيسلم على هادي و شادي و طلب منه يعطيه رقم تلفون البرنامج و نيكولا عم يعطيه الرقم هادي
دخل ع الخط و عطاه الرقم و هو عم يضحك و كان بلش يلعب باللعبة يفتل الزنبرك / المفتاح / و ترن اللعبة / و هي صوتها مثل
صوت رنة التلفون / و هو صار يقول ألو ألو و يضحك و صار يشاغب و يقول عجقة خطوط عجقة خطوط و يضحك و بعدين نيكولا
أخذ اتصال و طبعا هادي ضل يلعب باللعبة و يمزح مع المتصلين و مع المذيع و حكت معه بتول و سلمت عليه و باركت له بالكليب و
طبعا هادي ما وقف عن اللعب إطلاقا و نيكولا قالو : هادي بليز فينا نكمل بدي أسألك كيف علاقتك مع تلفزيون المستقبل عم يهتموا فيك
مثل مو لازم؟؟

هادي : هلأ أنا لوحدي ،

نيكولا : لوحدك ؟ شو قصدك ؟ ،

هادي : لوحدي ،

نيكولا : ما دعموك أبدا ؟؟؟

هادي : أنا لوحدي هلأ الله يخلين حرام دعموني بس مش بأيدن القصص يلي صارت فما عم يصير في دعم مش منن بس و مش مني كمان
بس القصص يلي صارت فوق طاقتن فصرت لوحدي

نيكولا : أها طيب رح نأخذ اتصال من جان من لبنان سلم على هادي و قال إنه بيحبه كثير

نيكولا : هادي خبرني حبيت البرنامج تبعي؟؟

هادي : حبيت الإذاعة قبل كل شي حبيتكن كلكن و حبيتك أنت و المخرج و تحياتي الن و بدي أشكر شربل سعادة لأنو هو يلي جابني لهون
و تحياتي الو و بشكره

نيكولا : هادي خبرني قديش عندك انتقادات بتتلقاها؟؟

هادي : كثير أكيد بس الانتقادات أكثر شي بيفيدني صدقني لأنو كل شي مدح و هيدا بيقلك حلو و كذا و أغنيتك حلوة و غنيت حلو ما بيفيدني
أنا لأنو بدي انتقاد حتى صححوا فورا لأنو إذا الشي يلي ما بينقدوك عليه بيكون زابط

نيكولا : بدي أطلب منك مقطع من أغنيتك؟

هادي : من غنيتي؟؟؟!! أوكي / غنى مقطع رجعتيلي من بعد غياب و عكس المقاطع بدل ما يقول رجعتيلي من بعد غياب....
شو بقلك من بعد رجوع غنى بدالها هيدي حالة قلبي لما.....بس طلعت معه كثير حلوة و بعدها حطوا مقطع منها

نيكولا : سهرتنا قربت تخلص مع الأسف و أنا ما بدي أختم ،

هادي مقاطعا و مازحا عم ابكي...

نيكولا : شفته هادي عم يبكي لا حرام جيبوا له كلينكس هادي ليش عم تبكي؟؟

هادي : ما بدي أختم / يضحك /

نيكولا: طيب شوبدك ؟منضل سهرانين للساعة 5 أو 6 الصبح هيك هيك أنت ما بتنام إلا الساعة 7 الصبح؟؟

هادي : أوكي ما عندي مشكلة انا معك مبسوط بس ما بدي تعبكن ،

نيكولا : لأ تعبك راحة ،

هادي : أي كتر خيرك تعبك راحة و عم تزور فيني / يضحك / و رجع يلعب باللعبة و يفتل هالمفتاح و ترن اللعبة و يقول ألو ألو

نيكولا : هادي يا مشاغب خلينا نأخذ اتصال أخير لليوم حكت معه ريما سلمت على هادي و باركتله بالكليب و طبعا عم يحكي معها و هو
عم يلعب باللعبة ما وقف أبدا

نيكولا : للأسف اللقاء خلص هادي شو بتحب تقول شي ما قلته الليلة و شو بتقول و بتوعد المستمعين قبل سنة 2006؟؟

هادي : بدي أوعدن إن شاء الله بكليب مرتب و حلو وانشالله بيعجبن و أنا حبيته شخصيا لأنه كليب كثير حلو لأنو رح يكون الي و بس مش
للبنات يلي عم يكونوا بكل كليب جديد / يضحك / الكليب مرتب و حلو و بيقدروا يحضروه مع العيلة كلن و مع ولادن الصغار / يضحك / و بدي أشكر كل يلي عم يسمعنا و قللن يا رب ضل عند حسن ظنن على طول و بدي أشكرك الك و الإذاعة كمان

نيكولا : أنا بدي أشكرك هادي لحضورك و بتمنالك كل التوفيق السنة الجاية تكون سنة خير عليك و إن شاء الله اللقاء التاني معك يكون
لما يصدر العمل الك و نحتفل كلنا سوا فيه

هادي : إن شاء الله يا رب

نيكولا : شكرا لحضورك و بوجه تحية لكل يلي عم يسمعونا و كان معكن من وراء المايكروفون ...

هادي مقاطعا : كان معكن من وراء المايكروفون هادي أسود / يضحك / ،

نيكولا: أي كان معكم المشاغب هادي أسود / يضحكان /

و لآخر لحظة و هادي عم يلعب باللعبة
نيكولا و هادي قالوا مع بعض باي
خلص اللقاء الساعة 3 إلا 5 دقائق و حطوا أغنية بيستاهل قلبك بالختام

يسلمو عالنقل الحلووو

وبالتوفيق لهادي

ماننحرمش

تسلمين اختي الف شكر لج

ما اكتر حكيهم

هههه

شكرا أحلا وحده بالعالم